Орусияда Мамлекеттик дума 22-июлда интернеттен "экстремисттик мүнөздөгү" маалымат издөөгө жаза каралган мыйзам долбоорду үчүнчү окууда кабыл алды.
Ага ылайык, Административдик жоопкерчилик жөнүндөгү кодекс жаңы беренелер менен толукталды. Эми интернеттен “экстремисттик” материал издөөгө айыптуу деп табылган жарандарга үч миңден беш миң рублге чейин айып пул салынат.
Дагы бир өзгөртүүгө ылайык, Орусиянын аймагында VPN-сервистерин колдонууда мыйзам бузгандарга дагы жаза каралган. Анда күнөөлүү деп табылган жарандарга 50 миңден 200 миң рублге чейин, ал эми кызмат адамдарына 80 миңден 200 миң рублге чейин, ал эми юридикалык тараптарга 200 миңден бир миллион рублге чейин айып пул салынышы мүмкүн.
Буга чейин бул мыйзам кабыл алынса полициянын жарандарды көчөдөн токтотуп алып телефондорун негизсиз аңтарып тинткен учурлар көбөйөт деген кооптонуу айтылып жаткан.