Евробиримдиктин тышкы иштер мекемесинин башчысы Кая Каллас "Орусияга каршы бирден бир катаал сакциялар пакети" макулдашылганын билдирди. Каллас Европа Украинага колдоосун улантып, Орусия согушту бүтүрмөйүнчө Москвага басымды күчөтө берерин жарыялады.
18-санкциялык пакет "Чоң жетиге" кирген өлкөлөргө Орусиянын чийки мунайынын баасын баррелине 47,6 долларга чейин түшүрөт. Ошондой эле "Түндүк агым-1" жана "Түндүк агым-2" газ куурлары менен жаңы келишимдерге тыюу салат.
Бейшембинин кечинде Словакиянын премьер-министри Роберт Фицо Братислава Брюсселдин 18-пакетин колдой турганын билдирген.
Европа Биримдигине мүчө мамлекеттердин тышкы иштер министрлери 16-июлда дагы Орусияга каршы санкциялардын 18-пакетин макулдаша алган жок.
"Европалык чындык" басылмасы өз булактарына шилтеме кылып, Брюсселдеги жыйында Словакия менен Мальта дагы каршы чыкканын жазды. Тышкы иштер министрлердин кийинки жыйыны эми 18-июлда болот.
Ерошаркеттин өкүлдөрү 15-жыйында дагы санкцияга байланыштуу орток пикир таба алган эмес жана анда дагы Братислава менен Валлетта каршы болгон.
Словакия мурда кабарлангандай, эгер орус газы келбей калса, анын чыгымын толук жабуу үчүн шаркеттен кенемте талап кылууда. Мальта болсо орус мунайынын баасы көтөрүлүп кетсе, кара май ташыган флотко кесепети оор болот деп чочулайт.
Санкциялардын 18-пакетинде орус мунайына бааны кескин көтөрүү, "Түндүк агым" жана "Түндүк агым-2" газ куурларына тыюу салуу, Орусиянын банктарына жаңы чектөөлөрдү киргизүү каралып жатканы маалым болгон.
Украинанын Донецк облусундагы Доброполье шаарында Орусиянын чабуулунан кеминде эки адам мерт болуп, дагы 27 киши жараат алды. Облустук прокуратуранын маалыматына караганда, шаардын борборуна "ФАБ-500" үлгүсүндөгү авиабомба ташталган.
Соккуда 50дөн ашык соода жайы, 304 батир жана 13 жер там, дагы сегиз машина жабыркады.
Купянск, Днепр, Смоленск облустары дагы бутага алынып, жараат алгандар бар.
Орусия Добропольеге жасалган чабуул тууралуу комментарий берген жок.
Орусиянын Коргоо министрлиги 16-июлда кечинде Украинанын дагы 48 дрону атып түшүрүлгөнүн билдирди. Воронеж облусунун губернатору бир учкучсуз аппарат көп кабаттуу үйгө кулап, үч өспүрүм жараат алганын ырастады.
"Росавиация" 17-июлда жергиликтүү убакыт боюнча таңкы саат 6дан тартып Санкт-Петербург шаарындагы "Пулково" аэропорту убактылуу жабылганын жарыялады.
Анын алдында Ленинград облусунун губернатору Александро Дрозденко аймакта дрондон чабуул жасалышы ыктымалдыгы эскертилгенин кабарлаган.
Украина Тула облусундагы Щекино шаарына дагы чабуул жасап жатканы жөнүлдө кабарлар чыкты. Социалдык тармактарда жарылуулар, учкучсуз аппараттар тууралуу видеолор жарыяланды.
Согуш маалында бул билдирүүлөрдү бейтарап булактардан ырастоо мүмкүн.
Орусиянын Воронеж шаарына жасалган чабуулда оор жараат алган бир адам набыт болду. Бул тууралуу шаардын мэри Сергей Петрин билдирди. Ал Телеграм каналына жаран ооруканада оор жараат алып комада жаткан жеринен үзүлгөнүн жазды.
Буга чейин Воронеж облусунун губернатору Александр Гусев Украинанын 15-июлга караган түнү жасаган чабуулунда жалпы 27 киши жараат алганын, алардын 14ү бейтапканага жеткирилгенин билдирген. Маалыматтарга караганда, эки адамдын абалы оор.
Киев Воронежге жасалган сокку тууралуу комментарий берген эмес.
Ал арада Украинанын Аба күчтөрү Орусия 16-июлга караган түнү 400дөй дрон менен аткылаганын билдирди. Ага ылайык, Кривой Рог, Харьков жана Винница бутага алынган.
Мунун алдында Кривой Рогдогу жергиликтүү бийлик согуш башталгандан бери бул аймак узакка созулган тынымсыз аткылоого туш болгонун, 17 жаштагы бала оор жараат алганын билдирген. Винницада соңку чабуулда кеминде сегиз, ал эми Харьковдо үч адам жараат алды.
Согуш маалында бул маалыматтарды бейтарап булактардан ырастоо мүмкүн эмес.